झापा । नेपाली काँग्रेसका नेता कृष्णप्रसाद सिटौलाले जनताको पक्षमा संविधान संशोधन हुनुपर्ने बताएका छन् । झापाको कचनकवलमा बुधबार आयोजित नेपाली काँग्रेसको कचनकवल-सगरमाथा जागरण अभियान शुभारम्भ कार्यक्रममा बोल्दै नेता सिटौलाले यस्तो बताएका हुन् ।
नेता सिटौलाले संविधान संशोधन कुनै पार्टी र व्यक्तिको पक्षमा हुन नहुने बताए । उनले जनताको हितमा बाधा गरेको ठाउँमा संविधान संशोधन हुनुपर्ने बताए । संविधान जारी भएपछि आजसम्मको राज्य सञ्चालनका बारेमा पनि समीक्षा जरुरी रहेको बताए । देशकै ठूलो राजनीतिक दल भएर पनि दोस्रो ठूलो दलका नेतालाई काँग्रेसले प्रधानमन्त्री मानेर अघि बढिरहेको बताए । सरकार एमालेको नेतृत्वमा भएपनि सैद्धान्तिक र नीतिगत रुपमा देशलाई अघि बढाउने सन्दर्भमा नेपाली काँग्रेस पार्टीको नीतिगत नेतृत्व रहेको बताए।
नेता सिटौलाले भने, ‘नेपाली काँग्रेस पार्टी समग्रमा नेपाली जनताको अधिकारको लागि सङ्घर्ष गर्दै आएको छ । जनताको आर्थिक प्रगतिका लागि त्यति नै सङ्कल्परत छ । हामी देशको प्रगतिका लागि सबैलाई एकाकार गरेर, सबैलाई हिँडाउन हामी तत्पर छौँ । अहिले नेकपा एमाले र नेपाली काँग्रेसको सरकार छ । ओलीजीले सरकारको नेतृत्व गरेका छन, एमालेको अध्यक्षले । हामी सरकारमा सामेल छौँ । आजको दिनमा पनि नेपालमा सबैभन्दा ठूलो पार्टी गएको निर्वाचनको मात्रै तुलना गर्ने हो भने नेपाली काँग्रेस पार्टी सबैभन्दा ठूलो र शक्तिशाली पार्टी छ । स्थानीय तहमा पनि र सबैतिर हामी ठूलो पार्टी छौँ । हामी ठूलो पार्टी भएर पनि दोस्रो पार्टी एमालेको नेतालाई प्रधानमन्त्रीमा समर्थन गरेका छौँ ।
सरकारमा सामेल भएका छौँ । सरकार एमालेको नेतृत्वमा भएपनि सैद्धान्तिक र नीतिगत रुपमा देशलाई अघि बढाउने सन्दर्भमा नेपाली काँग्रेस पार्टीको नीतिगत नेतृत्व रहनेछ । हाम्रो विचारलाई वाद गरेर, हामीले अँगालेको नीतिलाई वाद गरेर संविधानले स्थापित गरेको मार्गलाई वाद गरेर कोही अगाडि जान सक्दैन । त्यसैले हामीले भन्ने गरेका छौँ, संविधान संशोधन गरौँ, जनताको पक्षमा । पार्टी विशेषको पक्षमा होइन । नेता विशेषको पक्षमा होइन, संविधानको कुन धाराले जनताको हितमा बाधा पारेको छ, स्थानीय सरकारलाई जनताको काम गर्न केले बाधा गरेको छ रु प्रदेश सरकारलाई केले बाधा गर्यो । सङ्घीय सरकारलाई केले बाधा गरेको छ । संविधान जारी भएपछि आजसम्म राज्य सञ्चालन कसरी भयो त्यसको समीक्षा गरौँ ।’ उनले अहिलेसम्म सङ्घीय शिक्षा ऐन बन्न नसक्नु दुःखको विषय भएको बताए ।